Hō͘-tēng

 Hō͘-tēng                                                                        biô-siá chiá: Van Lai

Góa bat thiaⁿ pat-lâng kóng kòe, ū chi̍t-kóa-á chin ū hok-pò ê lāu-tōa-lâng, in ē kám-èng tio̍h ka-kī beh lâi kòe-óng, tiō seng kā sin-āu ê tāi-chì hoat-lo̍h hó-sè, kòe bô gōa kú chin-chiàⁿ khùn-khùn-á kòe-ón--khì. M̄-koh, lâng sī m̄ sī chin-chiàⁿ ē àn-sǹg ka-kī ê sìⁿ-miā beh chīn-pōng leh? Che góa bô hoat-tō͘khak-tēng. Put jî kò, ē-bīn chit chân tāi-chì sī 2014 nî, goán kui-ke-hóe-á chò-tīn ûi-lô͘ ê sî, a-bú kóng-chhut—lâi, hoat-seng tī goán tau ê sū-kiāⁿ.

Hit kang beh-àm-á ê sî, ûi-lô͘ ê hang-lô͘-á hóe, góa chá to khí hó ah. Îⁿ-toh-á phong-phài ê chhài sek pâi kah kui toh téng. Í-thâu-á mā pâi hó-sè ah. Chi̍t bóe chhoe hó ê chhiⁿ chio̍h-pan tú phâng chiūⁿ toh, khì-bī sī phang-kòng-kòng. Lê-bah-soàn thng chá tiō kún kah leh chhèng-ian ah. O͘-hî-chí kah chhài-thâu khòaⁿ tio̍h chhùi-nōa-chúi kiông beh chhap-chhap-tih. Kui kháu-chàu ta̍k-ke chē chò-hóe hoaⁿ-hí thoân-îⁿ leh chia̍h-pn̄g.

“Hó ka-chài sī lín a-bú thài ióng-kám, bô lín nn̄g hiaⁿ-tī-á tō ài chiàu-lûn lâi kah lína-pa khùn!” Tú chia̍h bô gōa kú, a-bú ngeh chi̍t-tè Gî-Lân thoân-thóng chhài-thâu-ló͘ khǹg tī i ê óaⁿ. Pe nn̄g-chhùi pn̄g liáu-āu hiông-hiông kóng chhut chit kù ōe.

Góa kah goán tōa-ê chē tī toh-á piⁿ, nn̄g lâng ba̍k-chiu sio tùi-siòng,  nih chi̍t ê chò àm-hō, tiām-tiām lóng m̄-káⁿ ìn-siaⁿ. Góa thau bî chi̍t ê á piⁿ-á chē tī lûn-í téng ê a-pa. I tú-hó óaⁿ phâng khí lâi beh lim sio-thng.

A-pa tī chi̍t-tang gōa chêng ê nî-té, thâu-bóe nn̄g-kò-goe̍h lāi, kha-thâu-hu ê ē-pêng lóng kì-tiāu. Cha̍p-it-goe̍h chhoe tò-kha kha-pôaⁿ kui phìⁿ lóng hoán-o͘, bô kiù ah seng kì tiāu. Cha̍p-jī-goe̍h té ōaⁿ chiàⁿ-pêng ê kha-pôaⁿ hoán-o͘, koh kì chiàⁿ-kha. I chiâⁿ chá to tài tn̂g-hun. M̄-koh, I m̄-bat ūi I ê kiān-khong lâi khiūⁿ I ê chhùi. Sam-chân pûi-bah chhùi lāi khì. Tāng-kiâm chu-bī bô kìm kì. Āu--âi bú kah kui hun-su chek-chúi. Chek kàu hì, bē chhoán khùi, sàng kip-chín. I-seng toān kóng io-chí pháiⁿ-liáu-liáu ah, ài chò jîn-kang hoeh-kin khai-sí sé-io-chí. Sé kàu-taⁿ chhiau-kòe cha̍p-tang ah.

Chit kúi nî--á, chhut-ji̍p pēⁿ-īⁿ sī sù-siông ê. Tài thn̂g-hun ê lâng sûn-khoân ē khah bái, a-pa ê kha-chéng-thâu-á chi̍t ki chi̍t ki bān bān á hoán o͘. I-seng mā chi̍t ki chi̍t ki kā chián tiāu. I-seng kah hō͘-lí-su kiàn-pái lóng hoan-hù kóng lim-chúi ài khòng-chè. M̄-koh, a-pa tú chiah koh thó beh lim chi̍t óaⁿ thng. A-bú kóng kòe-nî ûi-lô͘ bô kìm-kī hō͘ i lim, bóa-kín.

“Cha-hng pòaⁿ-mê, i ka-kī pê chiūⁿ lûn-í, tùi āu-piah keng sak chhut--lâi, kā chhâ-mn̂g kah gōa kháu ê thih-mn̂g lóng khui-khui--khui, beh chhut khì gōa-kháu. Khó-lêng sī hō͘-tēng siuⁿ koân, sak bē chhut-khì, to oat ji̍p lâi kho̍k góa ê mn̂g.” Goán ta̍k-ke khòaⁿ kui toh-téng ê chheⁿ-chhau, tī lóng khǹg loh lâi m̄ káⁿ tín-tāng leh thiaⁿ a-bú kóng.

Lāu-bó͘ ah! Lâi kā góa sak chhut-khì lah.”” Lín a-pa àn-ne kā góa kóng. Góa gán chi̍t-ê--á sî-cheng, tú-tú-á hó pòaⁿ-mê cha̍p jī tiám!” A-bú ngeh chi̍t phìⁿ koàn-chhiâng kah Gî-lân soàn-á kè-siok kóng.

“Góa peh khí lâi kā khòaⁿ, mn̂g long khŭi khui-khui. Hó ka chài chit kúi kang thiⁿ khì chiâⁿ hó, bô hong bô hō͘. Góa kā mē kóng “Hiah nih àm ah, lí beh khì tó ūi!” Lín chai iáⁿ i àn chóaⁿ kā góa hôe?” Siūⁿ bē kàu a-bú koh ē ké kúi ké koài, siâⁿ goán ê ūi-kháu. Goán ta̍k ke chhùi á khŭi khui, lia̍h a-bú kim-kim-khòaⁿ.

“I kóng, lō͘ á thâu hia ū lâng leh tán--i, beh chhōa I tńg khì soaⁿ téng.” A bú kóng kah chiâⁿ pêng chēng. Goán long lia̍h a-pa khòaⁿ. A pa chia̍h pá ná leh tuh-ku ah. Hiông-hiông góa kám-kak kha-chiah-phiaⁿ liâng-léng, ke-bó-phôe long giâ-khí-lâi.

Chi̍t chūn tiām chēng liáu āu. “Bóe ah leh?” Góa chiú-poe-á phâng khí-lâi beh kah a-bú lim chi̍t--poe, sūn sòa mn̄g a-bú.

“Kā mē mē leh, koh kā sak ji̍p-khì khùn ah!” A-bú sio-chiú chi̍t chhùi lim loh, koh sūn-sòa gîn chi̍t-ê-á leh tuh-ku ê a-pa.

Nn̄g lé-pài liáu āu, lán-lâng chiaⁿ-goe̍h cha̍p-jī thàu-chá gō͘ tiám. Hit kang sī ha̍k-hāu ē-ha̍k-kî khai-ha̍k ê tē it kang, góa ê a-pa kòe-sin.